توڑ دینا ہے اگر عہدِ وفا، جا چلا جا

سوچ کر کچھ اُسے میں نے ہی کہا، جا چلا جا

طرزِ جمہور مِرے شہر کا دستور نہیں

ایسا سودا نہ بِکے گا نہ بِکا، جا چلا جا

ہر طرف پھیلا ہوا ہے کسی نفرت کا حصار

گیت اِس میں تو محبت کا نہ گا، جا چلا جا

یہ گھٹن پھیلتی جاتی ہے مرے چاروں طرف

چھوڑ کر بس مِرا دروازہ کُھلا، جا چلا جا

مِلک حاکم کی ہے، ہم سب ہیں مزارعے اُس کے

حکمِ حاکم پہ نہ آواز اٹھا، جا چلا جا

تیرے مذہب میں تو ہجرت پہ بھی مِلتا ہے ثواب

ظُلم اور جبر کی چھائی ہے فضاء، جا چلا جا

جبر کے سامنے کیوں کہتا ہے تو کلمۂ حق

حُکمِ حاکم بھی تو ہے حُکمِ خدا، جا چلا جا

مُنصفِ وقت بنے ہیں یہاں بازار کی جِنس

کون دے گا تجھے انصاف بھلا، جا چلا جا

محتسب کو کہاں فرصت کہ اٹھائے سولی

کاٹ کر اپنی ہی گردن کو دِکھا، جا چلا جا

کر دیئے اس نے کھڑے اونچی فصیلوں کے حِصار

کیسے آئے ترے آنگن میں ہوا، جا چلا جا

شہر کا شہر ترِے خون کا پیاسا ہے حسنؔ

آخری خط میں مجھے اس نے لِکھا، جا چلا جا

Torr dena hai agar ehd-e-wafa, ja chala ja
Soch kar kuch usay mein nai he kaha, ja chala ja
Tarz-e-jamhoor meray shehr ka dastoor nahi
Aisa sauda na bikkay ga na bikka, ja chala ja
Har taraf phaila hua hai kisi nafrat ka hisaar
Geet iss mein tou mohabbat ka na ga, ja chala ja
Yeh ghuttan phailti jati hai meray chaaroun taraf
Chorr kar bas mera darwaaza khula, ja chala ja
Mulk-e-haakim ki hai hum sab hain mazaray iss ke
Hukam-e-haakim pay na aawaz uttha, ja chala ja
Teray mazhab mein tou hijrat pe bhi milta hai sawaab
Zulm aur jabr ki chhaee hai fiza, ja chala ja
Jabr ke samnay kyun kehta hai tu kalma-e-haq
Hukam-e-haakim bhi tou hai hukam-e-khuda , ja chala ja
Munsif-e-waqt banay hain yahan bazaar ki jins
Kon de ga tujhay insaaf bhala, ja chala ja
Mohtasib ko kahan fursat ke uthaye suli
Kaat kar apni he gardan ko dikhaa, ja chala ja
Kar diye uss nai kharay oonchee faseeloun ke hisaar
Kesay aeye teri aangan mein hawa, ja chala ja
Shehr ka shehr teri khoon ka piyasa hai Hasan
Aakhri khat mein mujhe uss nay likha, ja chala ja