جفا کیشی تو اہلِ حُسن ہی کا کام ہے ساقی

جنونِ عاشقی تو مفت میں بدنام ہے ساقی

جِسے چاہا وہی پہلو بدل کر چل دیا آخر

وفا نا آشنائی کی روش اب عام ہے ساقی

بہاریں جس کی خاطر پا برہنہ پھرتی رہتی ہیں

نہ جانے کِس گلی میں وہ بُتِ گلفام ہے ساقی

خلاؤں میں اُسے آخر کہاں تک ڈھونڈنے جاؤں

کہ ہر دھڑکن اسیرِ گردشِ ایّام ہے ساقی

چلا ہوں دوستو پھر سے طوافِ کوئے جاناں کو

کفن جس کو سمجھ بیٹھے ہو تم احرام ہے ساقی

نہ جھانکو اسطرح ماضی کی یادوں کے دریچوں سے

اِدھر آؤ کہ تم سے اِک ضروری کام ہے ساقی

بکھرتی جا رہی ہے چاندنی کیوں دِل کے آنگن میں

ذرا چلمن ہٹا کر دیکھنا، کیا شام ہے ساقی

کہو اُس سے نہ یوں بن ٹھن کے میرے سامنے آئے

نیا صیّاد ہے لیکن پُرانا دام ہے ساقی

جنوں نے بھی خِرد مندی میں ہی اپنی بقاء دیکھی

جو کل تابہِ فلک تھا آج زیرِ بام ہے ساقی

میں اُسکو دیکھتا ہوں، جھومتا ہوں، پیتا جاتا ہوں

مرے ہاتھوں میں کب سے ایک خالی جام ہے ساقی

بھری محفل میں اے فوّاد تیری کم نگاہی بھی

بڑا اعزاز ہے ساقی، بڑا اِکرام ہے ساقی

Jafaa kaishee tou ahl-e-husn he ka kaam hai saaqi
Junoon-e-aashiqui tou muft mein badnaam hai saaqi
Jise chaaha wohi pehlu badal kar chal diya aakhir
Wafa na ashanaee ki rawish ab aam hai saaqi
Bahaarain jis ki khatir paa barhana phirti rehti hain
Na janay kis gali mein woh but-e-gulfaam hai saaqi
Khalaoun mein usay aakhir kahan tak dhoondnay jaoun
Ke har dharkan aseer-e-gardish-e-ayyam hai saaqi
Chala hoon dostoun phir se tawaf-e-koy-e-jaana ko
Kafan jis ko samajh baithay ho tum ahraam hai saaqi
Na jhaanko iss tarah maazi ki yadoun ke dareechoun se
Idhar aao ke tum se ik zaroori kaam hai saaqi
Bikharti ja rahe hai chaandani kyun dil ke aangan mein
Zara chilman hataa kar daikhna, kiya shaam hai saaqi
Kaho uss se na yun ban thann ke meray samnay aaye
Naya sayyad hai lekin puraana daam hai saaqi
Junoon nai bhi khirad mandee mein he apni baqaa dekhi
Jo kal taa-baa-e-falak tha aaj zair-e baam hai saaqi
Mein uss ko daikhta hoon, jhoomta hoon, peeta jata hoon
Meray hathoun mein kab se aik khaali jaam hai saaqi
Bhari mehfil mein aay Fawad teri kam nighahe bhi
Barra aizaaz hai saaqi, barra ikram hai saaqi