بٹھا کے ایک تصوّر کو روبرو میں نے

خود اپنے آپ سے کی رات گفتگو میں نے

نہ جانے کتنے شگوفوں کو چُھو کے آئی تھی

نسیمِ صبح کو دیکھا لہو لہو میں نے

کوئی گلاب کِھلا ہے ابھی ابھی شاید

سُنی تھی تیری ہی آواز ہو بہو میں نے

وہ آج گھر کے دریچوں سے جھانکتے پایا

اِک عمر شہر میں کی جس کی جستجو میں نے

تمہاری یاد سے دِل کو تسلّیاں دی ہیں

کیا ہے خار سے دامانِ گل رفو میں نے

ہوں منتظر کہ وہ شاید اِدھر ہی آ نکلے

ابھی چھوئے بھی نہیں ساغر و سُبو میں نے

ہر ایک شخص کو دیکھا ہر انقلاب کے بعد

دریدہ پیرہن و طوق درگُلو میں نے

ہر ایک چاند ہے بے جان پتھروں کی زمیں

بہت قریب سے دیکھے ہیں خُوبرو میں نے

لہو بکھیرا ہے فوّاؔد خارزاروں میں

رکھی ہے آبلہ پائی کی آبرو میں نے

Bitha ke ik tassawur ko roobaroo mein nai
Khud apnay aap se ki raat guftagoo mein nai
Na janay kitnay shagoofon ko choo ke aaye the
Naseem-e-subh ko dekha lahu lahu mein nai
Koi gulaab khilla hai abhi abhi shayyad
Sunni thi teri he awaaz hoo bahoo mein nai
Woh aaj ghar ke dareechoun se jhaanktay paya
Ik umar shehr mein ki jis ki justujoo mein nai
Tumhari yaad se dil ko tasalliyan di hain
Kiya hai khaar se daaman-e-gul rafoo mein nai
Hoon muntazir ke woh shayyad idhar he aa niklay
Abhi chooway bhi nahi saghar-o-suboo mein nai
Har aik shakhs ko dekha har inqilaab ke baad
Dareeda pairahan-o-taouq dar guloo mein nai
Har aik chaand hai bay-jaan patharoun ki zameen
Bahut qareeb se dekhay hain khoobaroo mein nai
Lahu bakhera hai Fawad khaar’zaroun mein
Rakhi hai aabla payee ki aabaroo mein nai