اِک نیا درد جگایا تھا، مگر آخرِ شب

گیت ایک اُس نے سُنایا تھا، مگر آخرِ شب

پھر وہی کُنجِ قفس اور وہی ہجر کی رات

وہ مِرے پاس تو آیا تھا، مگر آخرِ شب

لفظ چُن چُن کے برتنے کا سلیقہ تھا اُسے

پیار تو اُس نے جتایا تھا، مگر آخرِ شب

جس نے دِن بھر مری راہوں میں چُنے تھے کانٹے

پھول بھی لے کے وہ آیا تھا، مگر آخرِ شب

کیسے لمحوں میں کٹی جاتی تھی وہ وصل کی رات

اُس نے احساس دلایا تھا، مگر آخرِ شب

شام بھر بیٹھا رہا مجھ کو وہ بانہوں میں لیے

پھر مجھے اُس نے ستایا تھا، مگر آخرِ شب

ہر طرف دن میں دکھائی دیئے لوگوں کے ہجوم

شہر پر موت کا سایا تھا، مگر آخرِ شب

دار پر کھینچ رہا تھا وہ مجھے اوّلِ صبح

اُسکا پیغام جو لایا تھا، مگر آخرِ شب

جو گریزاں تھا میرے سائے سے دن بھر فوادؔ

پیار سے اُس نے بلایا تھا، مگر آخرِ شب

Ik naya dard jagaya tha, maggar aakhr-e-shabb
Geet aik uss nai sunnaya tha, maggar aakhr-e-shabb
Phir wohee kunj-e-qafas aur wohee hijr kee raat
Woh meray paas to aaya tha, maggar aakhr-e-shabb
Lafz chunn chunn kai baratnay ka saleeqa tha ussay
Piyar to uss ne jataayaa tha, maggar aakhr-e-shabb
Jis nay din bhar mairee raahoun mein chune thay kantay
Phool bhi lay kay woh aaya thaa, maggar aakhr-e-shabb
Kaisay lamhoun main kattee jati thi woh wasl ke raat
Uss nay ehsaas dilayaa tha, maggar aakhr-e-shabb
Shaam bhar baitha raha mujh ko woh banhoun main liyay
Phir mujhay uss nay satayaa tha, maggar aakhr-e-shabb
Har taraf din mein dikhayi diye logon ke hajoom
Shehar par mout ka sayaa tha, maggar aakhr-e-shabb
Daar par khech raha tha woh mujhe awwal subah
Uskaa pegham jo laya tha, maggar aakhr-e-shabb
Jo guraizaan tha meray saaye se din bhar Fawad
Piyar say uss nay bulaaya tha, maggar akhr-e-shabb