سیاہ گھنیری اداس راتوں کا اِک تسلسل
اور اُس میں ہم سب
خود اپنی ہستی کی زندگی کے لئے
دلیلیں تراشتے ہیں
یہ سوچتے ہیں کہ زندگی تو
بکھرتے رنگوں، نکھرتے جذبوں، اُبھرتی سوچوں
کا نام ہے نا
سو ہم بھی زندہ ہیں
زندگی کی تمام رسمیں نباہتے ہیں
مگر یہ سب تو
ہماری اپنی نحیف سوچوں کے زاویے ہیں
یہ خود فریبی، یہ کم نگاہی
ہمیں وِراثت میں جب مِلی تھی
تو ہم نے خود کو
اِسی کی تحویل دے دیا تھا
وگرنہ سچ تو
بہت ہی کڑوا ہے، جاں گَسل ہے
ہماری آنکھوں میں روشنی کا نہ عکس زندہ، نہ رنگ باقی
ہماری سوچوں پہ ضا بطوں کی گرفت ایسی
کہ ذہن اُنکے لئے سلاسل، زبان اُنکے لئے اضافی
ہمارے ہاتھوں میں لفظِ آزاد ہتھکڑی ہے
ہمارے پیروں میں بیڑیاں ہیں
کہ جن کی چَھن چَھن سے
حاکموں کو سکون مِلتا ہے، سوچتے ہیں
کہ پہ رعایا ہمارے وقتوں میں
عیش کرتی ہے، ناچتی ہے
مگر یہ کیا ہے؟
یہ کیا شبیہ ہے؟
جو ایک دیوار پر لگی ہے
یہ دیکھی بھالی عجیب صورت
یہ کِس کی اُمیّد کا شجر ہے
یہ کِس کے جذبوں کی چارہ گر ہے
وہ شخص خود تو زمانہ بیتا
،بڑے سکوں سے
کہیں سرِ دار سو گیا ہے
مگر دِلوں میں
سحر کی امید بو گیا ہے
سیاہ گھنیری اداس راتوں کے اِس تسلسل میں
چاندنی کی کِرن کہیں سے
سمو گیا ہے۔

Siyaah ghanairi udaas raatoun ka ik tasalsul
Aur uss mein hum sab
Khud apni hasti ki zindagi ke liye
Daleelain taraashtay hain
Yeh sochtay hain ke zindagi tou
Bikhartay rangoun, nikhartay jazboun, ubharti sochon ka
Naam hai na
Sou hum bhi zindaa hain
Zindagi ki tamaam rasmein nibaahtay hain
Magar yeh sab tou
Hamari apni naheef sochon ke zaawiyay hain
Yeh khud faraibi, yeh kam nighahi
Hume wiraasat mein jab mili thee
Tou hum nai khud ko
Issi ki tehweel de diya tha
Wagarna sach tou
Bahut he karrwa hai, jaan gassal hai
Hamari aankhon mein roshni ka na aks zindaa, na rang baaqi
Hamari sochon pe zaabatoun ki girift aisi
Ke zehan un ke liye salaasil, zabaan un ke liye izaafi
Hamaray hathoun mein lafz-e-azaad hathkari hai
Hamaray pairon mein berriyan hain
Ke jin ki chhann chhann se
Hakimoun ko sukoon milta hai, sochtay hain
Ke yeh riaayaa hamare waqtoun mein
Aish karti hai, nachti hai

Magar yeh kiya hai?
Yeh kya shabeeh hai?
Jo aik deewar par lagi hai
Yeh dekhi bhaali ajeeb soorat
Yeh kis ki umeed ka shajjar hai
Yeh kis ke jazboun ki chaara gar hai
Woh shakhs khud to zamana beeta
Barray sukoun se
Kahin sar-e-daar sou gaya hai
Magar diloun mein
Sehar ki umeed bo gaya hai
Siyaah ghanairi udaas raatoun ke iss tasalsul mein
Chandni ki kiran kahin se
Samou gaya hai