مرے چمن میں کِھلا تھا جو پھول بن کے خوشبو بِکھر گیا وہ

جو میرے آنگن کی چاندنی تھا نہ جانے اب کِس کے گھر گیا وہ

جو رات بھر چاند بن کے میری جواں اُمنگوں کے ہم سفر تھا

کسِی حسیں خواب کیطرح سے سحر ہوئی تو بکھر گیا وہ

گذار دی جس کے گھر کی دہلیز پر جوانی کی گرم راتیں

سُنا ہے مجھ کو تلاش کرنے گلی گلی دربدر گیا وہ

وہ ایک سایہ کہ روشنی میں چلا قدم سے قدم مِلا کر

جو دور تک میرے ساتھ آیا مگر اندھیروں سے ڈر گیا وہ

میں کِس کی زنجیرِ در ہلاؤں کہاں سے انصاف لے کے آؤں

کہ جس گواہ کی شہادتوں پر تھا میرا تکیہ مُکر گیا وہ

مجھے یقیں ہے تمہاری منزل کوئی مسافر نہ پا سکے گا

کہ تیرا نقشِ قدم جہاں بھی کسِی نے دیکھا ٹھہر گیاوہ

عجیب اندازِ دوستی ہے نہ آشنا ہے، نہ اجنبی ہے

ابھی ابھی میرا ہم سفر تھا ابھی نہ جانے کِدھر گیا وہ

نظر جھکائی تو اُس کو دیکھا، نظر اٹھائی تو بے نشاں ہے

عجیب مانوس اجنبی تھا مجھے تو حیران کر گیا وہ

سُنا ہے فّواؔد زرد چہروں کی داستانیں رقم کرے گا

وہ ایک شاعر کہ حُسنِ جاناں پہ شعر کہتا تھا مر گیا وہ

(Nazr-e-Nasir Kazmi)

Meray chaman mein khila tha jo phool ban ke khushboo bikhar gaya woh
Jo meray aangan ki chaandni tha na janay ab kis ke ghar gaya woh
Jo raat bhar chaand ban ke meri jawaan ummangoun ke humsafar tha
Kisi haseen khawaab ki tarah se sehar hui to bikhar gaya woh
Guzaar di jis ke ghar ki dehleez par jawaani ki garm raatain
Suna hai mujh ko talaash karnay gali gali darbadar gaya woh
Woh aik saaya jo roshni mein chala qadam se qadam mila kar
Jo duur tak meray saath aaya magar andheroun se dar gaya woh
Mein kis ki zanjeer-e-dar hilaoun kahan se insaaf lai ke aaoun
Ke jis gawah ki shahadatoun par tha mera takkiya, mukar gaya woh
Mujhe yaqeen hai tumhari manzil koi musafir na paa sakay ga
Ke tera naqsh-e-qadam jahan bhi kisi nay dekha, thehr gaya woh
Ajeeb andaaz-e-dosti hai na aashnaa hai, na ajnabi hai
Abhi abhi mera humsafar tha abhi na janay kidhar gaya woh
Nazar jhukai to uss ko dekha, nazar uthai to bay nishaan hai
Ajeeb manoos ajnabi tha mujhe tou hairaan kar gaya woh
Suna hai Fawad zard chehroun ki dastaanain raqam karay ga
Woh aik shayyar ke husn-e-jaana pe shair kehta tha, mar gaya woh