کبھی دریا یہاں سے چند قدموں کی مسافت تھا
جہاں حدِّ نظر قبریں دکھائی دے رہی ہیں
بہت سے اَن کہے قِصے
بہت سی اَن کہی باتیں
بکھرتی جالیوں کے روزنوں سے
سِرکتی آرہی ہیں
اور سُنائی دے رہی ہیں
کبھی تاریخ لکھی جا رہی تھی
تو لفظوں نے گواہی دی
کہ اُلفت اور محبت کی بہت سی داستانیں
اِن مزاروں میں بھی کَندہ ہیں
کئی قصےّ عداوت کے
کئی لمحے بغاوت کے
یہاں دیوارو در اور سیڑھیوں پر
چاپ دیتے تھے
ہمیشہ کی طرح لیکن
کوئی حاکم، کوئی سالار جب اُن کو
منوں مٹی کے نیچے دفن کر کے
اپنے استبداد کی اِک داستاں لِکھتا
جنوں کو جُرم کہتا
اور محبت رائیگاں لِکھتا
تو بے چہرہ مؤرّخ
پھر اُسے تاریخ کر دیتے

میں صدیوں کی مسافت پر کھڑا
دھند ہوتی ساعتوں کو دیکھتا ہوں
سوچتا ہوں
مِری تاریخ بھی شاید کسیِ ایسے مؤرّخ نے لکھی ہے
جنہیں مصلوب ہونا تھا
وہ تختِ تمکنت یہ ایستادہ ہیں
جنہیں اِذنِ حکومت تھا
وہ ڈھلتی رات کے پچھلے پہر میں
فنا کے شہر کو رُخصت ہوئے ایسے
کہ رُخصت کرنے والوں میں
کوئی چہرہ شناسا بھی نہیں تھا

نہ جانیں کیوں مری آنکھیں
زمانے کی حدوں سے ماورا
اِک اور منظر دیکھتی ہیں
میرے جیسا کوئی بھٹکا مسافر
شہرِ جاناں کے
کسیِ ایسے ہی آثارِ قدیمہ پر کھڑا ہے
سوچتا ہے
کبھی دریا یہاں سے چند قدموں کی مسافت تھا
جہاں حدِّ نظر قبریں دکھائی دے رہی ہیں

Kabhi dariya yahan se chand qadmoun ki musafat tha
Jahan hadd-e-nazar qabrain dikhai de rahe hain
Bahut se ankahay qissay
Bahut si ankahi baatein
Bikharti jaaliyoun ke rouzanoun se
Sirakti aa rahe hain
Aur sunaye de rahe hain
Kabhi tareekh likkhi ja rahi thi
Tou lafzoun nai gawaahi di
Ke ulfat aur mohabbat ki bahut si dastaanain
Inn mazaroun mein bhi kandaa hain
Kaiee qissay adawat ke
Kaiee lamhay baghawat ke
Yahan deewar-o-dar aur seehriyon par
Chaap detay thay
Hamesha ki tarah lekin
Koi haakim, koi salaar jab unn ko
Man-o-matti ke neechay dafan kar ke
Apnay istibdaad ki ik dastaan likhta
Junoon ko jurm kehta
Aur mohabbat raigaan likhta
Tou bay chehra Moarrakh
Phir usay tareekh kar daitay

Mein sadiyoun ki musafat par khara
Dhund hoti sa’aton ko daikhta hoon,
Sochta hoon
Meri tareekh bhi shayyad kisi aisay moarrakh nai likhi hai
Jinhe masloob hona tha
Woh takht-e-tamkanat pe aistaada hain
Jinhe izn-e-hukumat tha
Woh dhalti raat ke pichlay pehar mein
Fanaa ke shehr ko rukhsat huye aisay
Ke rukhsat karnai waloun mein
Koi chehra shanaasa bhi nahi tha

Na jane kyun meri aankhen
Zamanay ki hadoun se maawara
Ik aur manzar dekhti hain
Meray jaisa koi bhattka musafir
Shehr-e-jaana ke
Kisi aisay he aasaar-e- qadeemaa par kharra hai
Sochta hai
Kabhi dariya yahan se chand qadmoun ki musafat tha
Jahan had-e-nazar qabrain dikhai de rahe hain