وہی راستے، وہی منزلیں، وہی گردشیں مہ و سال کی

وہی داستانِ جنونِ دل، وہی یاد چشمِ غزال کی

وہ بھٹک رہا ہے نہ جانے کیوں مرِی سوچ کے خم و پیچ میں

کہ وہ جو جانتا تھا گلی گلی، مرے شہرِ فکر و خیال کی

اِسی کشمکش میں اسیر ہوں، اُسے رازِ دل کی خبر کروں

کہیں آبرو ہی گنوا نہ دوں میں خود اپنے دستِ سوال کی

یہ امیرِ شہر کا حکم ہے میں قفس کو رشکِ چمن کہوں

وہی بوئے گل پہ ہیں قدغنیں، وہی حسرتیں پر و بال کی

ہوئے ایک سے مرے روز و شب، وہ چلا گیا تو تلاش ہے

میرے دن کو مشعلِ مہر کی، مری شب کو شمعِ ہلال کی

نہ وہ آشنا ہے نہ اجنبی، نہ ہی دور ہے نہ قریب ہے

سبھی دوریاں سبھی قربتیں ہیں میرے طلسمِ خیال کی

میرے ذہن و دل میں سما کے وہ من و تو کی حد سے گزرگیا

نہ اب انتظار کی کلُفتیں، نہ اب آرزو ہے وصال کی

جو یہاں سے دیکھوں تو چاند ہے، جو قریب جاؤں تو دشت ہے

یہ عجیب سی ہیں حقیقتیں تیرے شہرِ حسن و جمال کی

مرے دِل میں کب سے مکیں ہے وہ، مگر اجنبی سا ہے آج تک

جسے اپنے گھر کا پتا نہیں اُسے کیا خبر مرے حال کی

میں اُسی سے فوادؔ کیا کہوں غمِ زندگی کی حکاتیں

کہ مرے زوال کی داستاں ہے اُسی کے اوجِ کمال کی

Wohi raaste, wohi manzilain, wohi gardishain mah-o-saal ki
Wohi dastan-e-junoon dil, wohi yaad chashm-e-ghazaal ki
Woh bhattak raha hai na janay kyun meri soch ke kham-o-paich mein
Ke woh jo janta tha gali gali, meray shehr-e fikar-o-khayal ki
Issi kashmakash mein aseer hoon, usay raaz-e-dil ki khabar karun
Kahin aabaroo he ganwa na doun mein khud apnay dast-e- sawal ki
Yeh ameer-e-shehr ka hukam hai mein qafas ko rashk-e-chaman kahun
Wohi booay-e-gul pe hain qadghanain, wohi hasaratain par-o-baal ki
Huye aik say meray roz-o-shab, woh chala gaya to talaash hai
Meray din ko mashal-e-mehar ki, meri shab ko sham-e-hilaal ki
Na woh aashnaa hai na ajnabi, na he door hai na qareeb hai
Sabhi dooriyan sabhi qurbatain hain mery tilism-e-khayal ki
Meray zehan-o-dil mein samaa ke woh mann-o-tou ki hadd se guzar gaya
Na ab intezaar ki kulfatain na ab arzoo hai visaal ki
Jo yahan se dekhon to chaand hai, jo qareeb jaun tou dasht hai
Yeh ajeeb si hain haqeeqtain teri shehr-e-husn-o-jamaal ki
Meray dil mein kab se makeen hai woh, magar ajnabi sa hai aaj tak
Jise apnay ghar ka pata nahi usay kiya khabar meray haal ki
Mein ussi se Fawad kia kahun gham-e-zindagi ki hikayatain
Ke meray zawaal ki dastaan hai ussi ke auj-e-kamal ki