مری زمیں پر کئی دِنوں سے
عجیب موسم اُتر رہے ہیں
رُتیں نا مہرباں ہونے لگی ہیں
بہاریں آ بھی جائیں تو
نہ پھولوں میں کوئی رنگ ہے
نہ خوشبو ہے
ہوائیں چل پڑیں پھر بھی
فضاء اُن سے معطّر ہو نہیں پاتی
برستی بارشیں جو ایک مدّت سے
مری جان اور دِل کے
بند دروازوں کو وا کرتی
مِری آنکھوں کے خوابوں کو جلاء دیتی
مِری سوچوں کے پنچھی آسماں کی وسعتوں میں
بھیگنے کو چھوڑ دیتی تھیں
جو اب آئیں
تو اس شدّت سے آتی ہیں
زمینیں، بستیاں، فصلیں سبھی
تاراج کر کے چھوڑ جاتی ہیں
خزاں کے رنگ جو دِل میں ہمیشہ
نئی دنیاؤں کی خواہش جگاتے تھے
بہت محروم سے
بے مہر سے ہونے لگے ہیں
مگر یہ کیسے ممکن ہے
اِن بہاروں اور خزاؤں
بارشوں اور سردیوں کے ساتھ مِری عمر گُذری ہے
یہ سب تو میرے موسم تھے
مِرےاندر اُترنا جانتے تھے
یہ مجھ سے پیار کرتے تھے
مجھے اِک صُبح نو کی لَو بھی دیتے تھے
مگر اب کے برس جانے کہاں سے
کِسی نے کوئی ایسا اِسم پھونکا ہے
کہ سب موسم، سبھی منظر بدلتے جا رہے ہیں
ہوا کا تُند خو ہونا تو اچھی بات ہے لیکن
زمیں نا مہرباں ہو جائے تو
درختوں سے پرندے گھونسلے بھی چھوڑ جاتے ہیں
زمینوں اور اُن کے باسیوں سے
کئی صدیوں کے رشتے توڑ جاتے ہیں
یہ تم بھی جانتے ہو گے
پرندے کُوچ کر جائیں جہاں سے
وہاں پر نا گہانی آفتیں یلغار کرتی ہیں
شہر، گاؤں، جزیرے، بستیاں
ویران ہو جاتی ہیں اور پھر
عمر بھر فریاد کرتی ہیں

یہ سب لیکن انہی شہروں میں ہوتا ہے
جہاں انصاف خود مصلوب ہو جائے
جہاں مظلوم ہی معتوب ہو جائے
جہاں نفرت، حقارت، بے یقینی، بے ثباتی
اور بے مہری ہی بس اُسلوب ہوجائے

!مرے خدایا
کوئی تو ہو جو مری زمیں کو
یقین دے دے، ثبات دےدے
ملامتوں اور عداوتوں کی
تمام سوچوں کو مات دےدے
ہماری اندر کی نفرتوں کے تمام زخموں پہ رکھ کے مرہم
مرے شہر کو عذاب رُت سے نجات دےدے
مری زمیں کو اِک اور تازہ حیات دےدے

Meri zameen par kai dino se
Ajeeb mausam utar rahay hain
Rut’tain na mehrbaan honay lagi hain
Bahaa’rain aa bhi jayen tou
Na phooloun mein koi rang hai
Na khushboo hai
Hawain chal parain phir bhi
Fizaa unn se muat’tar ho nahi pati
Barasti barishain jo aik muddat se
Meri jaan aur dil ke
Band darwaazoun ko waa karti
Meri aankhon ke khawabon ko jala daiti
Meri sochoun ke panchhi aasmaan ki wussatoun mein
Bheeganay ko chhor deti thee
Jo ab aayen
Tou iss shiddat se aati hain
Zameenain, bastiyaan, faslain sabhi
Taa’raaj kar ke chor jati hain
Khizaan ke rang jo dil mein hamesha
Naye duniyaon ki khawahish jagatay thay
Bahut mehroom se
Bay-mehar se honay lagay hain
Magar yeh kaisay mumkin hai
Inn baharoun aur khizaaoun
Barishoun aur sardiyoon ke saath meri umar guzri hai
Yeh sab to meray mausam thay
Meray andar uttarna jantay thay
Yeh mujh se pyar karty thay
Mujhe ik subh-nou-ki lou bhi daitay thay
Magar ab ke baras janay kahan se
Kisi nai koi aisa ism phoonka hai
Ke sab mausam, sabhi manzar badaltay ja rahay hain
Hawaa ka tund khoo hona tou achi baat hai lekin
Zameen na mehrbaan ho jaye tou
Darakhtoun se parinday ghounsalay bhi chhor jatay hain
Zameenoun aur unn ke baasiyoun se
Kaiee saddiyoun ke rishtay torr jatay hain
Yeh tum bhi jantay ho gay
Parinday kooch kar jayain jahan se
Wahan par naa’gahane aaftain yalghaar karti hain
Shehr, gaoun, jazeeray, bastiyaan
Weraan ho jati hain aur phir
Umar bhar faryaad karti hain

Yeh sab lekin inhe shehroun mein hota hai
Jahan insaaf khud masloob ho jaye
Jahan mazloom he, maa’toob ho jaye
Jahan nafrat, hiqaarat, bay-yakeeni, bay-sabaati
aur bay-mehri he bas usloob ho jaye

Meray khudaya!
Koi tou ho jo meri zameen ko
Yaqeen de de, sabaat de de
Malamatoun aur adawatoun ki
Tamam sochoun ko maat de de
Hamari andar ki nafratoun ke tamam zakhmoun pe rakh ke marham
Meray shehr ko azaab rut se nijaat de de
Meri zameen ko ik aur taaza hayaat de de