!سُنو
ہمارے شہر پہ آسیب چھا رہا ہے
ہماری گلیوں میں اور مُحلّوں میں
خوف پاؤں جما چُکاہے
ہماری صُبحوں کی روشنی
ہم سے چِھن گئی ہے
ہمارے سر پر ہر ایک جانب
ردائے ظُلمت تنی ہوئی ہے
ہم اپنے پُرکھوں کے سب محاسن
گنوا چُکے ہیں
ہم اپنی نسلوں کی سب وراثت
لُٹا چُکے ہیں
ہم اپنے ہونے کے
سب حوالے مِٹا چُکے ہیں
ہماری سانسوں پہ جبرو ظلمت کے دائرے ہیں
ہمارے شاعر سُخن کو گروی اُٹھا چُکے ہیں
ہماری تاریخ کے قلم گر
اُدھورے سچ کو ہی اپنی منزل بنا چُکے ہیں
ہماری سوچوں کے زاویے بھی بدل گئے ہیں
ہمارے لہجے سے اور لُغت سے
مِٹھاس، اُلفت کے اور محبت کے
سارے صیغے نِکل گئے ہیں
ہر ایک لمحہ، ہر ایک لحظہ
ہم ایک دلدل میں دھنس رہے ہیں

مِری زمیں کے مجاوروں کو کوئی بتائے
کہ وقت ہاتھوں کی مُٹھیوں سے
اُسی طرح سے پِھسل رہا ہے
کہ جیسے ساحل پہ ریت
پیروں کے پانیوں سے نِکل رہی ہو
کہ جیسے یخ بستہ شب
اپنے مہیب دامن میں
موت کو لے کے چل رہی ہو
کہ جیسے آنکھوں کی پُتلیوں سے
اوراُنگلیوں کی تمام پوروں سے
جان ہر دم نِکل رہی ہو

مری زمیں کے مجاوروں کو کوئی بتائے
کہ لوگ تقسیم ہو رہے ہیں
تمام رشتے بھی اور تعلق بھی
اپنی توقیر کھو رہے ہیں
اُنہیں بتاؤ کہ اب پرندوں کے جُھنڈ سارے
دیارِ ہجرت کو چل پڑے ہیں
ہمارے آنگن میں دھوپ ایسی کڑی پڑی ہے
کہ اپنے سائے ہی جل گئے ہیں
درخت شاخوں کو، کھیت پانی کے رس کو
جیسے ترس گئے ہیں
ہمارے شہروں کی تنگ گلیوں میں
جیسے فاقے ہی بس گئے ہیں
اُنہیں بتاؤ کہ ساری خلفت
دُہائی دینے پہ آگئی ہے
سو اِس سے پہلے کہ خونِ نا حق
ہماری گلیوں کی اور محلّوں کی
نالیوں سے اُبل رہا ہو
اور اِس سے پہلے کہ
گھر تمہارا بھی جل رہا ہو
امان لے لو، امان دے دو

Sunoo!
Hamaray shehr pay asaib chhaa raha hai
Hamari galiyon mein aur muhaloun mein
Khauf paoun jama chuka hai
Hamari subahoun ki roshni
Hum se chin gayi hai
Hamaray sar par har aik jaanib
Riday-e-zulmat tanee huwi hai
Hum apnay purkhoun ke sab mohasin
Ganwaa chukay hain
Hum apni nasloun ki sab wirasat
Luta chukay hain
Hum apnay honay kai
Sab hawalay mitta chukay hain
Hamari saansoun pay jabr-o-zulmat ke daairay hain
Hamaray shaayar sukhan ko girwee uttha chukay hain
Hamari tareekh ke qalam gar bhi
Aadhay sach ko hi apni manzil bana chukay hain
Hamari sochon ke zawiye bhi badal gaye hain
Hamaray lehjay se aur lughat se
Mithaas, ulfat kai aur mohabbat ke
Saaray seeghay nikal gaye hain
Har aik lamha, har aik lehza
Hum aik daldal mein dhuns rahay hain

Meri zameen ke majawroun ko koi bataye
Ke waqt hathoun ki muthiyon se
Ussee tarha se phisal raha hai
Ke jaisay saahil pay rait
Pairoun ke paaniyon se nikal rahi ho
Ke jaisay yakh-basta shab
Apnay Moheeb daman mein
Mout ko le ke chal rahi ho
Ke jaisay aankhon ki putliyon se
Aur unglioun ki tmam poroun se
Jaan har dam nikal rahi ho

Meri zameen ke majawroun ko koi bataye
Ke log taqseem ho rahay hain
Tamam rishtay bhi aur taalluq bhi
Apni touqeer kho rahay hain
Unhain batao kai ab parindoun ke Jhund saaray
Diyar-e-hijrat ko chal parray hain
Hamaray aangan mein dhoop aisi karree parree hai
Ke apnay saaye hi jal gaye hain
Darakht shaakhoun ko, khait paani ke ras ko
Jaisay taras gaye hain
Hamaray shehroun ki tang galiyon mein
Jaisay faaqay hi bas gaye hain
Unhain batao ke saari khalwat
Duhayi dainay pay aa gayi hai
So iss se pehlay ke khon-e-na-haq
Hamari galiyon ki aur muhaloun ki
Naliyon se ubal raha ho
Aur iss se pehlay ke
Ghar tumhara bhi jal raha ho
Amaan lai lo, Amaan dai do