یہ معجزہ بھی تو اِک دِن خُدا دکھائے گا

کُھلے گی آنکھ تو پھر سامنے تو آئے گا

اِس انتظار میں عمریں گُذار دیں ہم نے

وہ چا ہتا ہے ہمیں، خود ہمیں بلائے گا

قفس نصیب تھے ہم سو یہاں پہ آ پہنچے

چلے بھی جائیں گے جِس دِن وہ وقت آئے گا

یہ سرد رات لہو منجمد ہی کر دے گی

غریبِ شہر سحر دیکھنے نہ پائے گا

میں اُس سے پہلے ہی اقبالِ جُرم کر لوں گا

وہ فردِ جُرم بھلا کِس پہ پھر لگائے گا

وہ جِس کو زعم تھا انصاف بانٹنے کا گیا

کبھی تو کوئی اُسے آئینہ دکھائے گا

ہر ایک جان چُکا ہے جو ہیں اصل کردار

امیرِ شہر بھلا کیا ہمیں بتائے گا

بس ایک ریت کی دیوار پر کھٹرا ہے محل

بچا نہیں کوئی سکتا، یہ گِر ہی جائے گا

سجا ہے مسندِ انصاف پر نیا چہرہ

سوال یہ ہے وہ انصاف کر بھی پائے گا؟

قفس کی تیرہ شبی سے بھی ہو گئے مانوس

عجیب لوگ ہیں، کیسے کوئی ستائے گا

یہ خامشی کسی طوفان کی علامت ہے

جو کوئی بول پڑے گا لہو رُلائے گا

حصار میں اُسے لے لیں گے لشکری میرے

اِک اور تِیر مرا رائیگاں ہی جائے گا

لہو رُلائیں گی اُسکو حؔسن مری آنکھیں

وہ چھین لے بھی تو اِن کو بُجھا نہ پائے گا

Yeh moujaza bhi tou ik din khuda dikhaye ga
Khulay gi aankhh tou phir samnay woh aaye ga
Iss intzaar mein umrain guzaar di hum nai
Woh chahata hai hume, khud hume bulaye ga
Qafas naseeb thay hum so yahan pe aa pohnchay
Chalay bhi jayen gay jis din woh waqt aaye ga
Yeh sard raat lahu munjamad he kar de gi
Ghareeb-e shehr sehar dekhnay na paaye ga
Mein uss se pehlay he iqbal-e-jurm kar loun ga
Woh fard-e-jurm bhala kis pe phir lagaye ga
Woh jis ko za’am tha insaaf baantnay ka, gaya
Kabhi tou koi usay aaaina dikhaye ga
Har aik jaan chuka hai jo hain assal kirdaar
Ameer-e-shehr bhala kiya hume bataye ga
Bas aik rait ki deewar par khara hai mehal
Bachaa nahi koi sakta, yeh gir he jaye ga
Saja hai masnad-e-insaaf par naya chehra
Sawal yeh hai woh insaaf kar bhi paye ga?
Qafas ki teerah shabee se bhi ho gaye manoos
Ajeeb log hain, kaisay koi sataaye ga
Yeh khamoshi kisi toofan ki alaamat hai
Jo koi bol paray ga lahu rulaye ga
Hisaar mein usay lai lain gay lashkari meray
Ik aur teer mera raygaan na jaye ga
Lahu rulayain gi uss ko Hassan meri aankhen
Woh cheen lai bhi tou inn ko bhuja na paye ga