سحر کا اِک نیا منظر دکھانے آیا ہوں

یہ رات کَٹ کے رہے گی بتانے آیا ہوں

جو ہم سے روٹھ چکے ہیں وہ خواب سے منظر

تمہاری آنکھ میں پھر سے بسانے آیا ہوں

لکھوں گا اپنی محبت کی داستاں پھر سے

میں اُس کے سارے خطوں کو جلانے آیا ہوں

جو مجھ سے روٹھ کے بیٹھا ہے ایک مدّت سے

اُس ایک دوست کو پھر سے منانے آیا ہوں

میں اپنے عہد کی تاریخ پھر سے لکھوں گا

یقین کا نیا منظر سجانے آیا ہوں

لکھا ہے تیرے مورخ نے پھر قصیدہ نیا

میں آئینہ اُسے بس اِک دکھانے آیا ہوں

فصیلِ شہر کے گرنے سے بس ذرا پہلے

میں اُس کے سارے حوالے مٹانے آیا ہوں

امیرِ شہر کا سارا فُسوں بکھرنے کو ہے

میں اُس میں آخری کیلیں لگانے آیا ہوں

نیا فریب نہ کوئی بھی کارگر ہو گا

میں کوتوالِ شہر کو بتانے آیا ہوں

جو سچ کی طرح اترتے ہیں مجھ پہ آخرِ شب

وہ خواب پھر سے تمہیں میں دکھانے آیا ہوں

بدل رہے ہیں ہواؤں کے رُخ حسن فؔواد

جو بجھ گئی تھیں وہ شمعیں جلانے آیا ہوں

Sehar ka ik naya manzar dikhaanay aaya houn
Yeh raat kat kai rahay gi batanay aaya houn
Jo ham say rooth chukay hain woh khwaab say manzar
Tumharee aankhh main phir say basanay aaya houn
Likhoon gaa apnee mohabbat kee dastaan phir say
Main uss kay saaray khatoun ko jalaanay aaya houn
Jo mujh say rooth kay baitha hai aik muddat say
Uss aik dost ko phir say mananay aaya houn
Main apnay ehed kee tareekh phir say likhoun gaa
Yaqeen ka naya manzar sajaanay aaya houn
Likha hai tairay moarrakh nay phir qaseeda naya
Main aaeena ussay bas ik dikhaanay aaya houn
Faseel-e-shehar kai girnay say bas zara pehlay
Main uss ke saaray hawalay mittanay aaya houn
Ameer-e-shehar ka saara fasoon bikharnay ko hai
Main uss main aakhree keelain laganay aaya houn
Naya farraib naa koee bhee kaargar ho gaa
Main kotwal-e-shehar ko bataanay aaya houn
Jo sach ki tarha utartay hain mujh pai aakhr-e-shabb
Woh khawab phir se tumhain main dikhaanay aaya houn
Badal rahay hain hawaoun kai rukh Hasan Fawad
Jo bujh gayee theen wo shammain jalaanay aaya houn