اب تو خواہش بس یہی ہے ایک گھر ایسا بھی ہو

چار دیواریں ہوں اُسکی اور وہ اپنا بھی ہو

یوں تو ہر لمحہ ہجومِ دوستاں ہے اُس کے ساتھ

کیا یہ ممکن ہے کہ وہ میری طرح تنہا بھی ہو

لفظ کو کیسے برتنا ہے سلیقہ ہو اُسے

اُس پہ یہ طُرفہ تماشا، حُسن میں یکتا بھی ہو

کتنی بے مہری سے اُس نے مجھ کو لوٹایا تھا تب

چاپ قدموں کی مرے وہ آج تک سُنتا بھی ہو

یوں تو سارا شہر مانگے حاکموں سے اب نجات

سامنے اُن کے یہ کہنے کا مگر یارا بھی ہو

ہیں سُبک رفتار کیسے ہم سوئے نا مہرباں

شہرِ جاناں سے پلٹنے کا کوئی رستہ بھی ہو

خلعتِ دربار بھی رُسوائی کا باعث بنے

اِس کے بدلے حرف کو میں نے اگر بیچا بھی ہو

آخری لمحے پہ آنا ہے اگر سود و زیاں

فائدہ کیا پھر اگر جمہور کا سودا بھی ہو

صُبح دم میں اُسکے دروازے پہ دستک دوں حسنؔ

رات کے پچھلے پہر میں اُس نے یہ سوچا بھی ہو

Ab tou khwahish bas yehi hai aik ghar aisa bhi ho
Chaar deewarain hoon uss ki aur woh apna bhi ho
Youn tou har lamha, hujoom-e-dostaan hai uss ke sath
Kiya yeh mumkin hai ke woh meri tarha tanhaa bhi ho
Lafz ko kaisay baratnaa hai, saleeqa ho ussay
Uss pay yeh turfa tamasha, husn mein yaktaa bhi ho
Kitni bay mehree se uss nai mujh ko lotaya tha tab
Chaap qadmon ki meray woh aaj tak sunta bhi ho
Youn tou saraa shehr mangay hakimoun se ab nijat
Samnay unn ke yeh kehnay ka magar yaara bhi ho
Hain subuk raftaar kesay hum soye na mehrbaan
Shehr-e jaana se palatnay ka koi rastaa bhi ho
Khilat-e-darbaar bhi ruswai ka baais banay
Iss ke badlay harf ko uss nai agar baicha bhi ho
Aakhri lamhay pe aana hai gar sood-o-zayaan
Faida kiya phir agar jamhoor ka sauda bhi ho
Subh dum mein uss ke darwazay pay dastak doun Hassan
Raat ke pichlay pehar mein uss nai yeh socha bhi ho