اپنا احساس وہ ایسے بھی سِوا رکھتا ہے

مِل بھی جائے تو مجھے دور ذرا رکھتا ہے

مجھ سے تنہائی میں ملِنے کا طلبگار ہے وہ

بزم اپنی کو جو غیروں سے بھرا رکھتا ہے

اُس کا کیا ہے وہ کہیں سے بھی پلٹ جائے گا

لوگ کہتے ہیں وہ اِک رستہ کھُلا رکھتا ہے

میرے احساس نے تقسیم کیا ہے مجھ کو

عشق میرا مجھے سُولی پہ چڑھا رکھتا ہے

اُس نے کر لی ہے نئی ایک لُغت بھی ایجاد

لفظ بُن لیتا ہے معنی کو جُدا رکھتا ہے

خواب کیا دیکھتے، تعبیر نظر کیا آتی

اُن کا امکان ہی آنکھوں کو کھُلا رکھتا ہے

وہ تِرے وصل کی خواہش کو بھلا کیا جانے

جو تِرے ہجر کو پھولوں سے سجا رکھتا ہے

لِکھ رہا ہے وہ مِری سوچ کی تفسیر حسؔن

اپنے خوابوں کو بھی جو مجھ سے چھُپا رکھتا ہے

Apna ehsas woh aisay bhi siwa rakhta hai
Mil bhi jaye tou mujhay door zara rakhta hai
Mujh se tanhai mein milnay ka talab-gaar hai woh
Bazm apni ko jo ghairon se bhara rakhta hai
Uss ka kya hai woh kahin se bhi palat jaye gaa
Log kehtay hain woh aik rasta khula rakhta hai
Meray ehsas ne taqseem kiya hai mujh ko
Ishhq mera mujhe suli pay charrha rakhta hai
Uss nai kar li hai naee aik lughat bhi ijaad
Lafz bun laita hai manee ko juda rakhta hai
Khawab kiya daikhtay, tabeer nazar kiya aati
Unn ka imkaan hi aankhon ko khula rakhta hai
Woh teray wasal ki khwahish ko bhala kiya jaanay
Jo teray hijar ko phoolon se saja rakhta hai
Likh raha hai woh meri soch ki tafseer Hassan
Apnay khowaboon ko bhi jo mujh se chhupa rakhta hai