وہ جن سے پاسِ عہدِ وفا بھی چلا گیا

اُن سے تو اختیارِ جفا بھی چلا گیا

اِک زُعم وہ کہ ہم کو جزاء پر ہے اختیار

اِک حشر یہ کہ حرفِ دعاء بھی چلا گیا

خود اپنی ذات کا تو یقین کھو چکے تھے وہ

اب اعتبارِ خلقِ خدا بھی چلا گیا

دعویٰ تھا جن کو اب کے اٹھائیں گے وہ صلیب

اُن سے تو اذنِ خلقِ خدا بھی چلا گیا

اِک کوتوالِ شہر کی بیعت کی دیر تھی

ہر اعترافِ جرم و سزا بھی چلا گیا

راس اُسکو آسکی نہ ہماری رفاقتیں

دو چار روز آکے رہا بھی، چلا گیا

متروک کر چکے تھے وہ قانون عمر سے

منصف سے اب تو خوفِ خدا بھی چلا گیا

کیسے بسی ہے شہر میں خوشبو وہی حسؔن

جو پھول اک گلاب کا تھا بھی، چلا گیا

Woh jin se paas-e-ehd-e-wafa bhi chala gaya
Unn se tou ikhtiyaar-e-jafaa bhi chala gaya
Ik zo’am woh ke hum ko jazaa par hai ikhtiyar
Ik hashr yeh ke harf-e-dua bhi chala gaya
Khud apni zaat ka tou yaqeen khou chukay thay woh
Ab aitbaar-e-khalq-e-khuda bhi chala gaya
Daawa tha jin ko ab ke utthayain gay woh saleeb
Unn se tou izn-khalq-khuda bhi chala gaya
Ik kotwal-e-shehr ki bait ki dair thi
Har aiytraaf-e-jurm-o-saza bhi chala gaya
Raas uss ko aa saki na hamari rafaqatain
Dou chaar roz aa ke raha bhi, chala gaya
Matrooq kar chukay thay woh qanoon umar se
Munsif se ab tou khauf-e-khuda bhi chala gaya
Kaisay bassi hai shehr mein khushbo wohi Hasan
Jo phool ik gulaab ka tha bhi, chala gaya